Valdís með fyrirlestur á brunch-degi GKG kvenna

Í gær var skemmtilegur viðburður á vegum kvennanefndar GKG þar sem 70 konur mættu og skemmtu sér vel yfir fjölbreyttri dagskrá.

Valdís Þóra Jónsdóttir, atvinnukylfingur úr Leyni sagði á skemmtilegan hátt í máli og myndum frá því hvernig hún hefur fikrað sig upp metorðastigann og komist á  LET mótaröðina. Leiðin hefur oft verið þyrnum stráð og ýmsar uppákomurnar,  en ótrauð hélt Valdís alltaf áfram. Valdís hefur um árabil verið í fremstu röð íslenskra kylfinga og Íslandsmeistari og margfaldur íþróttamaður Akraness.   

Samstarfssamningur við TARAMAR var einnig handsalaður í tilefni dagsins, en TARAMAR hefur sl. ár verið helsti styrktaraðili okkar.  Ljúffengar veitingar voru í boði hjá Vigni og hans starfsfólki á Mulligan, veitingastað GKG.

Kvennastarf GKG er afar öflugt og fleiri viðburðir verða boðaðir á næstunni.