Um 30 manna hópur GKG kylfinga heimsótti Thracian Cliffs golfvöllinn 23.-30. apríl. Að auki voru um 12 kylfingar úr öðrum klúbbum, m.a. Logi Bergmann og Rúnar Freyr Gíslason leikari auk tökuliðs, en Logi var að taka upp golf-spjallþáttaseríu sem sýnd verður á Stöð 2 í sumar.

Icegolf Travel sér um ferðir á Thracian Cliffs, sem er stórbrotinn golfvöllur hannaður af goðsögninni Gary Player. Player sjálfur hefur haft á orði að þetta sér magnaðasti völlur sem hann hefur hannað. Það kom enda í ljós að hægt er að taka hann trúanlegan, því hver braut er kyngimögnuð, með stórkostlegu útsýni frá teig. Hver braut og flöt var hönnuð með leikskipulag og útsjónarsemi í huga. Vissulega krefjandi völlur en teigaval var fjölbreytt og gátu allir notið þess að spila sanngjarnan völl.

Hópurinn naut sýn vel þessa viku og voru ýmis mót haldin. Allur aðbúnaður s.s. herbergi, matur og þjónusta hjá starfsfólki var frábær. Gulli fararstjóri, Sirrý og Vikar eiga mikið hrós skilið fyrir framúrskarandi þjónustu. Allir nutu sín vel og GKG stemmningin góða var svo sannarlega til staðar, það voru glaðir kylfingar sem komu heim í gær, tilbúnir og fullir tilhlökkunar eftir að vellir hér heima opni og golfsumarið hefjist.

Á facebook síðu GKG er að finna myndir úr ferðinni, sjón er sögu ríkari.

Við þökkum kærlega fyrir okkur!

Randver, Ingibjörg og Eggert á hinni stórkostlegu 6. braut